Næringsliv
Næringslivet i Bremanger er variert, og vi har stadig behov for meir kompetanse. Vi kan trenge ein som deg!
Historisk og moderne kraftkommune
I dag gjer vasskraft og vindkraft at Bremanger er ein av landets største produsentar av fornybar energi! Sogn og Fjordane Energi (SFE) har nesten 70 prosent av produksjonen sin i kommunen, og det meste er vasskraft.
Innan vindkraft er bergenske Eviny eigar av Guleslettene, og italienske Renantis eigar av Hennøya vindkraftverk.
Og tenk at dette energieventyret starta for meir enn hundre år sidan!
Råvarer og metall
Vi er ein ressursrik kommune med næringar som produserer råvarer som blir vidareforedla over heile verda.
Elkem lagar silisium som blir brukt i mobiltelefonar og datamaskiner nærast i alle verdas land.
Steinbrotet på Dyrstad leverer stein til vegar i Benelux-landa (Belgia, Nederland og Luxembourg).
Fiskeri
Bremanger er tradisjonelt ein fiskerikommune. I dag finn du både oppdrettsanlegg og fiskebåtar som legg til kai i kommunen.
Fiskeri og havbruksindustrien har store aktørar som Pelagia i Kalvåg i tillegg til Mowi, Eide Havbruk og Ode som driv torskeoppdrett på Davik.
Nokre startar fiskarkarrieren tidlegare enn andre, og er aktive i Ungdomsfiskerordninga til Fiskeridirektoratet.
Turistindustrien
Vi er eit velkjent turistmål, for både nordmenn og utlendingar. Dette skapar arbeidsplassar innan matindustrien, overnattingstilboda, kulturmiljøet, transport og oppleving.
Sjølv om Kalvåg av mange er rekna som turistsentrum, er det attraksjonar og servicejobbar i heile kommunen.
Velkjente namn er Dampen på Davik, Knutholmen i Kalvåg og Bremanger Fjordhotell i Svelgen med fjellturar og spektakulær utsikt.
Til og med den legendariske britiske fjellklatraren William Slingsby visste å benytte seg av fjella våre i si tid.
Kommunen som arbeidsgjevar
Vi må naturlegvis sjølvreklamere litt: Bremanger kommune er den største (og kanskje den mest varierte) arbeidsplassen lokalt. Vi er arbeidsgjevar for lærarar, sjukepleiarar, reinhaldarar, legar, ingeniørar, kontorarbeidarar og mykje, MYKJE, meir!
Vi treng nye tilsette for å halde oppe kvaliteten på dei kommunale tenestene i ein (sakte) aldrande befolkning. Derfor får alle nytilsette 30 000 kr ekstra per år opp til fem år.
Og om du er sjukepleiar eller vernepleiar får du eit eige tilskot attpåtil.
