Kombinasjonen av helsekompetanse og teft for leiing fortel mykje om hennar spesialinteresse:
– Eg er lidenskapleg opptatt av menneskje!
Anita hoppa på moglegheita for kommunalsjefstillinga då ho såg utlysinga, sjølv om ho ikkje var aktiv jobbsøkar. Førstegongsutlysinga hadde ho ikkje ein gong fått med seg.
– Eg er ei som heile tida søkjer ny kunnskap og erfaring. Sjølv om eg ikkje såg etter noko nytt, så kjenner eg meg driven til å bli med på denne spennande rolla.
Kva fekk Anita til å hoppe frå ein jobb ho trivest med til ein nyoppretta stilling i ein annan kommune? Anita seier ho ser på det som ein moglegheit til å jobbe tverrfagleg og få innsikt i mange ulike kompetanseområde.
– Det er spennet av menneskje og kompetanse som interesserer meg. Denne nye jobben vil utvide horisontane og gje meg nye moglegheiter til å utvikle meg som leiar, håper Anita.
I små distriktskommunar spøkast det ofte om at ein må vere ein «potet», altså å kunne brukast til alt mogleg. Dette er det Anita ser fram til i ein litt mindre kommune enn det ho er vande med.
– Eg er allereie ei som er nysgjerrig på kva dei andre rundt meg arbeider med, og ser heile tida etter samarbeidsmoglegheiter.
Anita har ikkje planar om å bli tilflyttar, men gler seg til pendlarlivet mellom Svelgen og Måløy. På bilradioen planlegg ho å høyre på podcast og lydbok.
– Det kan vere fare for at eg tek opp jobb-pcen på ferja, om eg ikkje klarar leggje frå meg jobben heilt etter arbeidsdagen, ler ho.
Ho kjem frå Halsnøy i Sunnhordland, men har budd i Måløy lengre enn ho har på Halsnøy. I Måløy har ho mann og to vaksne barn. Mellomnamnet Igland er frå ein distansert del av slekta i ytre Bremanger.