Fristen snart ute: Tomter til minstepris

Ti tusen for ei tomt

Felles for sala er at prisen er gunstig for den som vil kjøpe. Kommunen sel for minstepris. Minstepris betyr i dette tilfelle at prisen er heilt nede i 10 000 kroner for ei tomt. Ser ein dette i regionalt eller nasjonalt perspektiv, er prisen uvanleg låg.

Kommunen har lagt ut informasjon om framgangsmåten dersom du er interessert i å kjøpe.

Kommunalsjef Karl Vidar Førde.

Sal i fleire bygder

I Svelgen gjeld det tomter i Mevika, og Ospekleiva på Sande.

På Bråtane i Ålfoten er det tre ledige tomtar. Dette er tomtar som har vore ledige i mange år, og som kommunen no ønskjer å selje.

På Davik kjem helsehuset for sal på den opne marknaden. Her håpar kommunen å selje huset slik at det kan bli ombygd til leilegheiter. I Svelgen vil Langeneset barnehage bli lagt ut for sal på den opne marknaden. Også her er vona at ein utbyggar vil lage leilegheiter.

Kolset er ei anna bygd der kommunen legg ut tomter. Her er infrastrukturen på plass. I ytre ligg det ute fleire tomter på Hauge, både i Stasjonsvegen og Bakkane. I Kalvåg finst det tomter til sals i Svehogane, og på Steinset.

Dialog med Husbank og entrepenørar

Kommunalsjef Karl Vidar Førde fortel at kommunen har god dialog med Husbanken om ulike bustadutviklingsprosjekt:

– Vi ser også på eit bustadutviklingsprosjekt på Naustneset, ved sidan av Svelgen panorama 1.

Førde legg til at dei er i dialog med entreprenørar som har vist interesse.

Fristen er 15. oktober

Fristen for å levere inn bod på minstepristomtane er sett til 15.oktober fortel han:

– Vi har ein meklar som tar seg av det faktiske salet.

– Korleis har interessa vore?

– Litt blanda, men det er absolutt ein del som er interesserte.

– Kvifor skjer dette no?

– Tiltaket er ein del av rekrutteringspakken. Dei folkevalde har difor gitt administrasjonen grønt lys til å selje desse kommunale tomtene for minstepris, avsluttar Førde.

Det er utforma eit salsprospekt for tomtene. Prospektet ser slik ut: prospekt-kommunale-bustadtomter.pdf