Line budde lenge på Gjøvik, og har drive bensinstasjon både på Lillehammer og i Østerdalen. Men så ville ho skifte beite, og då blei det studiar i sjukepleie i vaksen alder. Det første året som student ved Mjøsa, og dei to neste i Førde.
– Då kom eg til Sunnfjord. Men dette var midt under koronaen så det sosiale livet var relativt avgrensa, ler ho.
Etter at ho var ferdig utdanna i Førde jobba ho ei tid i Jølster før det var tilbake til Innlandet for å ta seg av sine næraste.
Glad i havet
No er ho tilbake i gamle Sogn og Fjordane, men ikkje berre det. Ho har fått fast jobb som sjukepleiar i Bremanger, og jobbar i heimetenesta. Hus leiger ho i Svelgen.
– Målet er å kjøpe, men så langt er eg ikkje komen, smiler ho. Line legg til at ho fekk høyre om Bremanger då rekrutteringspakken blei lansert. Omtalen av kommunen gjorde henne meir interessert i korleis det er å leve og jobbe her:
– Så sjekka eg ut kva som ligg i pakken, og såg at dette ville eg vere ein del av.
Blir nokre fjelltoppar
På fritida er fjellturar den store lidenskapen.
– Eg har vore ein del i Kalvåg, og der er det kjempefint, seier ho. Men så er det Hornelen, og Keipen og alle dei andre fjelltoppane. For ikkje å snakke om Grotlesanden og Vetvika. Line Gunilla gler seg til våren, og seier ho er komen til Bremanger for å vere her.
Vi brukar Mailchimp som marknadsføringsplattform. Ved å klikka nedanfor for å abonnera, stadfestar du at informasjonen din vil verta overført til Mailchimp for handsaming.