Firdaposten har analysert alle frie bustadsal i Kinn og Bremanger i første halvår 2025 og 2026. Analysen viser ein moderat prisauke i Kinn, medan medianprisen i Bremanger har stige kraftig.
Auke på 60 prosent
Medianprisen på bustadsal i Bremanger har auka med over 60 prosent så langt i år samanlikna med same periode i fjor, skriv avisa. Det er tal frå tinglyste eigedomsoverdragingar som viser dette. Også i Kinn stig prisane, men langt meir moderat.
Tala er henta frå tinglyste heimelsoverdragingar registrert hos Statens kartverk, avgrensa til frie sal av bustadeigedom, for perioden januar–juni i 2025 og 2026.
Selte tre Elkem-hus
Auken kan ha samanheng med at Elkem har selt tre populære bustadar i Svelgen det siste halvåret, alle på Villabakken. Hus 8 var det arkitekt Leif Rustad som teikna under den første kraftutbygginga for meir enn hundre år sidan. Lia 17 blei bygd under krigen av Jebsen-familien som eigde både smelteverket og kraftstasjonen. Her budde direktøren i meir enn 80 år.
Det tredje Elkem-huset på Villabakken som blei selt tidlegare i år, har symjebasseng i hagen. Dette huset ligg ovanfor Lia 17, og har også vore funksjonærbustad for ingeniørane på Elkem Bremanger.
Bakkevegen 8 blir på folkemunne kalla Hus 8.
Kvm. pris på 12.600 kroner
I Bremanger er gjennomsnittleg kvadratmeterpris for annonserte hus for sal, no 12.600 kroner, ifølgje finn.no. Tilsvarande tal for Kinn er 29.400, og for Stad godt 26.000 kroner per kvadrat.
Merk at dette er prisantyding på finn.no, og ikkje faktisk sal, slik Firdaposten skriv om.
Oversikten på finn.no viser gjennomsnittleg pris i Bremanger sortert etter postnummer.
Davik er dyrast
Internt i Bremanger har Davik-området no den høgaste annonserte prisen. Der er gjennomsnittleg kvadratmeterpris for annonserte bustadar på 15.500 kroner.
Vi brukar Mailchimp som marknadsføringsplattform. Ved å klikka nedanfor for å abonnera, stadfestar du at informasjonen din vil verta overført til Mailchimp for handsaming.