Idylliske Hennøystranda ligg i Frøysjøen med utsikt til Hornelen, ein liten båttur sørover leia frå Leirgulen. I dag er her ingen fastbuande igjen, men likevel folk som kjem hit i helgar og feriar fordi dei vaks opp her, og framleis har fritidshus på denne staden. Ein av dei som er her ofte, er Atle Rise.
Etternamnet har han frå Rise i Svelgen. Atle vaks opp i Hennøystranda på 50-talet, saman med fleire søsken. Familien har framleis hus her.
– I min barndom budde det 70 menneske her, seier han.
Inne i skulehuset var det fullt av folk.
Gjekk over fjellet
På den tida Atle var barn, arbeidde fleire av fedrane i bygda på smelteverket i Svelgen slik så mange andre arbeidsføre menn frå bygdene i kommunen gjorde den gongen. Det spesielle med Hennøya var at her gjekk dei over fjellet når dei skulle til Svelgen på arbeid. I veka budde dei gjerne på ungkarsmessa før dei gjekk heim igjen over fjellet til familien på småbruket i helgane.
Framhaldskulen og realskulen tok Atle i Svelgen før ferda gjekk vidare til meir utdanning, mellom anna som musikar og organist.
Til basaren denne gong kom det folk andre vegen over fjellet for å vere med på samlinga. Dei hadde gått frå Sande. Turen tok godt to timar før dei var framme i bygda.
Menyen var rikhaldig.
Fullt hus og mange premiar
I skulehuset var det stuvande fullt under basaren. Dei tilreisande kunne kjøpe både kake og kaffi i tillegg til det tradisjonelle åresalet og loddsalet med mange premiar.
Skulehuset frå 1870-talet ligg idyllisk til ved elva, like ovanfor den gamle telegrafstasjonen som var i drift frå 1904.
Atle Rise fortel at då dei gjekk i småskulen brukte dei friminutta til å fiske aure i den viltre elva. Det må ha vore eit syn.
Sjølv om Hennøystranda i dag er fråflytta kan ein likevel snakke om eit livskraftig bygdesamfunn mange i Bremanger bryr seg om, og reiser tilbake til gong etter gong, slik vi såg dette spele seg ut under basaren andre helga i mai.
Taxi sto klar på kaia. Foto: Renate P. Johnsen.
Frå Hennøya har ein utsikt til Hornelen. Foto: Renate P. Johnsen.
Øyservice gjekk frå Leirgulen med dei som ville på basar.
Hennøystranda er ein idyll. Foto: Renate P. Johnsen.
Vi brukar Mailchimp som marknadsføringsplattform. Ved å klikka nedanfor for å abonnera, stadfestar du at informasjonen din vil verta overført til Mailchimp for handsaming.