Fruktsalat – konsert med svensk vri

Elisabeth Solbakken i kulturskulen fortel at det er korpsa som har dirigenten sin frå kulturskulen, som inviterer til konsert:

– Det betyr korps frå Kalvåg, Ålfoten og Bremanger, seier ho.

I tillegg skal barnekoret i Bremanger vere med, og fleire solistar.

Svensk fruktsalat
Så lurer sikkert nokon på kva fruktsalat har med dette å gjere. Svaret er den svenske komponisten Dan Bornemark, og ei plate han gav ut med tittelen Fruktsallad. Bornemark er sonen til Gullan som er ein profilert barnebokforfattar frå Skåne. Dan Bornemark har sett musikk til tekstane mora har skrive.

– Eg jobba på kulturskulen i Florø ein periode. Då sette vi opp dette stykket. I juni skal folk i Bremanger få glede av å høyre det same verket, men ikkje med strykarar. Vi har kjøpt notane av komponisten. Saman med rektoren vår, Raimund Hoclas, har eg skrive musikken om til messing og blåseinstrument, seier Elisabeth.

Dan Bornemark.

Tutti Frutti
Så fortel Elisabeth Solbakken at det blir meir enn svensk «Fruktsallad» på konserten i juni:

– Vi fyller på med meir moderne stoff i tillegg til dei svenske songane.

I desse TuttiFrutti-tider kan det altså hende du bør ta turen til Hauge, eller Svelgen, denne helga for å få med deg ei sjeldan kulturell oppleving.

I forkant av framsyningane blir det utstilling av visuell kunst, og uformelle innslag frå kulturskuleelevar i foajeen på samfunnshuset, og i vestibylen på ungdomsskulen på Hauge. Med andre ord, mingling og sosialisering på tvers av grendene. Det likar vi.